វិទ្យាស្ថានជាតិការងារ (វ.ជ.ក.) នៃក្រសួងការងារ និងបណ្តុះបណ្តាលវិជ្ជាជីវៈដែលបង្កើតឡើងដោយអនុក្រឹត្យលេខ ១១១ អនក្រ.បក ចុះថ្ងៃទី ១ ខែសីហា ឆ្នាំ ២០១៩ គឺជាគ្រឹះស្ថានអប់រំឈានមុខមួយក្នុងការបណ្តុះបណ្តាលលើជំនាញ ច្បាប់និងលិខិតបទដ្ឋានគតិយុត្តក្នុងវិស័យការងារ សន្តិសុខសង្គម នឹងបណ្តុះបណ្តាលវិជ្ជាជីវៈ ក៏ដូចជាជំនាញទន់ ដើម្បីលើកកម្ពស់ចំណេះដឹង និងជំនាញពេញមួយជីវិតប្រកបដោយគុណភាព ប្រសិទ្ធភាព និងវិជ្ជាជីវៈ សំដៅបង្កើន ប្រសិទ្ធភាពការងារ និងធ្វើឱ្យប្រសើរឡើងនូវសុខដុមរមនានៃទំនាក់ទំនងវិជ្ជាជីវៈនៅកន្លែងការងារ។ ជាមួយនេះ វ.ជ.ក. ក៏ដើរតួនាទីយ៉ាងសំខាន់ ក្នុងការផ្តល់ការប្រឹក្សាផ្នែកច្បាប់ពាក់ព័ន្ធនឹងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈនិងធ្វើការសិក្សាស្រាវជ្រាវជាអាទិ៍ទៅលើលក្ខខណ្ឌការងារ ទំនាក់ទំនងវិជ្ជាជីវៈ ផលិតភាព ការងារសុខភាពនិងសុវត្ថិភាពការងារ។ តាមរយៈគេហទំព័រនេះ យើងជឿជាក់ថា មន្ត្រីរាជការ និយោជក កម្មករនិយោជិត និងសាធារណជនអាចស្វែងរកព័ត៌មានអំពី វ.ជ.ក. វគ្គបណ្តុះបណ្តាល និងបទប្បញ្ញត្តិច្បាប់ពាក់ព័ន្ធនឹងវិស័យការងារ សន្តិសុខសង្គម នឹងបណ្តុះបណ្តាលវិជ្ជាជីវៈ ប្រកបដោយប្រសិទ្ធភាព និងឆាប់រហ័ស។
